Вечарам 25 чэрвеня ў Міжнародным адукацыйным цэнтры імя Ёханэса Раў (IBB) сабраліся рэкламісты і маркетолагі, мастакі і дызайнеры, музыкі і літаратары, журналісты і фатографы. Ад колькасці медыйных твараў займала дух нават у тых, хто сам з'яўляецца часткай гэтай тусоўкі. У непадрыхтаванага ж чалавека проста адымала мову.

«Лепшыя людзі беларускай рэкламы і дызайну? Вось яны!» — абводзіць рукой прысутных знаёмы піаршчык. Падзея, якая аб'яднала самых-самых, таго вартая: фестываль беларускамоўнай рэкламы і камунікацыі AD.NAK! адзначаў свой першы юбілей.

Святочны вечар складаўся з чатырох частак: прэс-канферэнцыі з арганізатарамі, сябрамі журы і партнёрамі фестываля, урачыстага адкрыцця з танцамі і пераразаннем стужкі (як без гэтага), працяглай цырымоніі ўзнагароджання пераможцаў з жывой музыкай ды after party з нефармальнай камунікацыяй.

Сяргей Скараход: «Калі мы будзем у трэндзе, пачнем браць грошы з удзельнікаў»

Падчас прэс-канферэнцыі спікеры сыпалі лічбамі і ўсе як адзін адзначалі абнадзейваючы рост цікавасці рэкламшчыкаў і спажыўцоў да прасоўвання тавараў і паслуг на беларускай мове. Размова паказала, што фестывалю ўдалося зрабіць пераварот у галовах некаторых прадстаўнікоў беларускага бізнэсу.


Так, маркетолаг першай катэгорыі ЗАТ «Плацежная сістэма Белкарт» Кацярына Калюга з вінаватай усмешкай паклялася, што неўзабаве пачне вучыць беларускую мову: «Мне вельмі падабаецца, калі людзі размаўляюць па-беларуску, але мне цяжка, я пужаюся. И мне уже сейчас проще перейти на английский, чем на белорусский».

Яе падтрымаў Святаслаў Семяніцкі, крэатыўны дырэктар камунікацыйнага агенства The Matter Minsk: «Мне таксама хацелася б размаўляць на беларускай мове, але я не магу так хутка. Мне прасцей перайсці на французскую».

Начальніку аддзела кіравання брэндам кампаніі Velcom Зміцеру Курловічу выбачацца не давялося. Ён размаўляў на добрай беларускай мове, паказваючы прыклад усім астатнім: «Мне прыемна, што гэты фестываль у пяты раз змог прыцягнуць увагу людзей, што іх стала больш. Гэтае мерапрыемства дапамагае нашай кампаніі абгрунтоўваць, скажам, перад аўстрыйскім офісам наш беларускамоўны напрамак. Менавіта фестываль AD.NAK! дапамог нам зрабіць кампанію часткова беларускай».

Алена Макоўская, каардынатар грамадскай культурніцкай кампаніі «Будзьма беларусамі!», звярнулася да журналістаў з лічбамі і рэйтынгамі. Паводле яе, сёлетні фестываль сабраў больш за чатыры сотні заявак ад амаль двух соцень удзельнікаў. Гэта значна больш, чым у мінулыя гады.

«Фэст з’яўляецца перспектыўнай пляцоўкай для данясення мэсэджу, што беларуская мова — гэта модна і цікава, — адзначыла Макоўская. — Прыемна, што назіраецца ўстойлівая цікавасць беларусаў да роднай мовы. Сёлетнія даследванні паказалі, што каля 56 адсоткаў беларусаў станоўча ставяцца да рэкламы на роднай мове.

Айчынны бізнэс таксама разумее, што наша мова ў рэкламе і камунікацыі паляпшяе продажы і пазнавальнасць прадукта. Да рэкламавання па-беларуску далучаюцца міжнародныя карпарацыі».

Кіраўнік праекта Marketing.by Сяргей Скараход адзначыў у сваю чаргу, што AD.NAK! — не міжсабойчык, «мы павінныя трымаць высокі фестывальны ўзровень. Таму ўдзельнікам не даем палёгкаў».

Журналістаў зацікавіла магчымасць фестываля стаць на камерцыйныя рэйкі. Паводле Скарахода, задачай арганізатараў зараз з'яўляецца намацванне трэндаў, якія трэба развіваць: «Тады бізнэс будзе звяртаць на іх увагу. Калі гэта адбудзецца, мы зможам сказаць, што мы дапамагаем кампаніям станавіцца больш паспяхоовымі і пачнем браць з удзельнікаў грошы за ўдзел у конкурсе».

Бог Аднак і саламяная камасутра

Адкрыццё фестываля адбылося весела і досыць хутка. Каардрынатар кампаніі «Будзьма беларусамі!» Ніна Шыдлоўская прадставіла прысутным апекуна мерапрыемства — бога Аднак і папрасіла пакласці ў скрынку ахвяраванне: цукерачку, візітоўку ці нешта яшчэ. «Не забывайцеся пра нашага дзеда!» — з усмешкай прамовіла яна, пераразаючы разам з Сяргеем Скараходам будаўнічую стужку. «Прыкольна! Толькі што быў богам, а стаў дзедам», — пачулася ў натоўпе гасцей.

Калі ў мінулым годзе арганізатары разам з партнёрамі фестываля зладзілі досыць насычаную fun-праграму, то сёлета яны вырашылі засяродзіць увагу прысутных на ўзнагароджанні пераможцаў. Апошніх было шмат. Вельмі шмат.

Вядучыя цырымоніі Ганна Хітрык (у якой у гэты дзень былі Нарадзіны) і Павел Харланчук (у якога Нарадзіны сёння, у дзень публікацыі рэпартажу) імкнуліся як мага хутчэй выдаць усю пратакольную інфармацыю, прапісаную ў сцэнары, бо «метро закрыецца, і мы адсюль не з'едзем».

Сёлета спіс намінацый склаў 21 пазіцыю — гэта абсалютны рэкорд конкурса, які сведчыць, што рэклама на беларускай мове жывые і актыўна развіваецца. Сябрамі журы было прысуджана 17 першых месцаў, 33 другія і 41 трэцяе. Самую вялікую колькасць заявак — больш за 130 — сабрала намінацыя «Графічны і камунікацыйны дызайн». На другім месцы «Сацыяльная рэклама»: было даслана 43 работы. Трэцяя пазіцыя ў намінацыі «Інтэрактыўная рэклама» — 37 праектаў.

Гран-пры юбілейнага фестываля атрымалі адразу шэсць праектаў. Гэта «Велікодныя біткі» ад брэндынгавай кампаніі «AIDA Pioneer», праект «Упэўненасць на дарозе» аўтарства Ганны Радзько і Алены Бай, «Простыя рэчы», выкананыя Getbob digital agency, серыя артыкулаў «Рома едзе» ад Ромы Свечнікава, вядомага чытачам 34mag, курсы беларускай мовы «Мова нанова» ды сацыяльная рэклама «Саламяная Камасутра», якую прыдумала і ажыццявіла рэкламнае агенства «NEF/TBWA&Dranik Style». Імёны ўсіх пераможцаў і прыклады работ можна паглядзець па спасылцы.

«Камасутра» стала самым паспяховым праектам. Яго стваральнікі выходзілі на сцэну пад апладысменты прысутных восемь разоў і раз за разам паўтаралі: «Кахайцеся!»

Кіраўнік творчай групы Улад Савельеў адзначыў: «Беларусаў павінна станавіцца больш, мы ж файныя! Мы спецыяльна ўжылі ў праекце словы прэзідэнта, каб ён быў больш вірусным. Нам хочацца, каб дзяржава па сацыяльную рэкламу звярталася да нас, бо тое, што вісіць на вуліцах Беларусі, не паддаецца крытыцы».

Сухім абвяшчэннем найлепшых рэкламістаў і дызайнераў не абыйшлося. У перапынках гучала жывая музыка. Мы паслухалі песні з новага альбома «Адліга» праекта Tanin Jazz, гурты «Босае сонца», Sunduk, спевака Юзары.


«На салодкае» арганізатары прыхавалі Лявона Вольскага і Паўла Аракеляна. Музыкі выканалі вядомыя хіты. «Ну як жа я сыйду без гэтай песні?» — сказаў Вольскі і зайграў «Тры чарапахі». Песню спявалі доўга і бадзёра. Усім залам.

Подпишись на Holiday.by!

Только отборные материалы в наших каналах

Читать Holiday.by
в Telegram
Читать Holiday.by
в Viber
Тэги: акции, имидж Беларуси