Мінск па-беларуску: чым заняцца 26 ліпеня - 1 жніўня?

У апошні ліпеньскі тыдзень нас чакаюць размовы пра горад, беларуская лірыка ў музыцы, мары пра В’етнам ды мультфільм пра лісіныя прыгоды. Падрабязнасці пра тое, куды ж сябе падзець у пераменлівым горадзе, шукайце ў нашым аглядзе :)

Фестываль - гэта пра “Камяніцу”, “Наш Грунвальд” ці “Вольнае паветра”. НеФестываль - гэта ўжо пра гарадскія ініцыятывы ды гарадскую прастору. Як кажа адзін з арганізатараў праекта Алег Ларычаў, фестываляў у краіне хапае. Таму нешта новае павінна выдзяляцца са стройных шэрагаў. Першы ў Беларусі НеФестываль гарадскіх ініцыятыў «Must Act» абяцае абмеркаваць утульнасць гарадоў, навучыць гарадскому “партызанінгу на раёне” і стварэнню гарадскіх інтэрвенцый. Воркшопы будуць праводзіць трэнеры з Беларусі, ЗША, Літвы, Францыі ды Індыі. Шматлікія трэнінгі, прэзентацыі, даклады ды круглыя сталы будуць высвятляць, чаму ў Мінску існуе праблема публічнай прасторы без людзей і што з гэтым можна зрабіць. У НеФестываля будзе адразу некалькі пляцовак: Музей сучаснага выяўленчага мастацтва, крэатыўны кластар МЕ100, канферэнц-зала Цэнтральнай дзіцячай бібліятэкі, галерэя TUT.by.

Калі: 25-30 ліпеня, падрабязную праграму можна паглядзець тут.

Уваход на ўсе мерапрыемствы вольны.

Rahis - гэта як арахіс, толькі больш беларускі. Зміцер Язвінскі і Дзяніс Філіпенка пачалі граць разам ў Беларускім дзяржаўным пэдагагічным ўнівэрсытэце, яшчэ калі былі студэнтамі факультэта прыродазнаўства. Але ж с той пары мінула ўжо столькі год, што і падумаць сорамна. За гэты перыяд гурт адграў ільвіную долю канцэртаў, канцэрцікаў ды кватэрнікаў (найлепшы фармат Rahis-аў). А вось альбом выйшаў зусім нядаўна. Новыя і не зусім новыя песні можна будзе паслухаць на любімай пешаходная вуліцы Карла Маркса. Як абяцаюць музыкі на сваёй старонцы УКантакце, у суботу а 19.00 знайсці іх будзе магчыма менавіта там. Айда слухаць беларускую лірыку пра гарады, прыроду ды пачуцці!

Дзе: пешаходная вуліца Карла Маркса

Калі: 27 ліпеня, субота, 19:00

Уваход вольны.

Замежныя фільмы на роднай мове? Чаму не! Штомесяц на розных пляцоўках Мінска праходзяць прагляды дубляваных фільмаў. Гэтым разам мы прапаноўваем паглядзець на прыгоды лісінай сямейкі - мультфільм “Неверагодны містэр Фокс”. Агучвалі мульт вядомыя беларускія акцёры, рэжысёр - Уэс Андэрсан, стваральнік чароўнага фільма “Каралеўства поўнага месяца”. Думаеце, ці ісці? Ды як жа можна не ісці на стужку, слоган у якой самы жыццярадасны: “Калі капнуць - жыццё цудоўнае!”.

Дзе: крэатыўны кластар МЕ100 (пр. Незалежнасці, 58 корп. 6)

Калі: 1 жніўня, чацьвер, 19:00

Квіток: 25.000 руб (студэнтам і дзеткам 15.000 руб)

Працяг мультфільма 1 гадзіна 27 хвілін.

Вядома, што сучасная палітыка нашай краіны накіравана на супрацоўніцтва з Усходам. Таму так часта на мінскіх плошчах можна пабачыць немясцовыя сцягі - гэта прымаюць усходніх гасцей. Вось да аднаго з такіх гасцёвых візітаў і адкрылася выстава “Усходні вектар: В’етнам”. Прысвечана яна, натуральна, візіту прэм’ер-міністра сацыялістычнай рэспублікі Вьетнам Нгуен Тан Зунга. На ёй можна будзе пабачыць розныя творы в’етнамскіх майстроў. Каб паглядзець на культуру ды традыцыі В’етнаму, трэба завітаць у дом-музей І-га з’езда РСДРП. Абяцаюцца, нават, кнігі в’етнамскіх аўтараў у перакладзе на беларускую мову, а беларускіх - на в’етнамскую. Такое не кожны дзень пабачыш!

Дзе: Дом-музей І-га з’езда РСДРП (пр. Незалежнасці, 31а)

Калі: штодзённа з 11:00 да 19:00 (панядзелак - выходны)

Кантакты: +375(17) 2906847

Экспазіцыя адкрыта для наведванняў з 26 ліпеня па 4 жніўня.

Ведаеце цікавыя мерапрыемствы, якія засталіся па-за гэтым аглядам? Дзяліцеся ў каментарыях!